لإفطار رمضان الشيف "ماهيتاب" تقدم رول الدجاج محشي أرز

 تقدم الشيف "ماهيتاب مصطفى " وصفة من الدجاج والأرز تناسب الأفطار في رمضان فهي تحتوى على اغلب المكونات الغذائية و يمكن تقديمها مع الخضار السوتيه أو السلطة الخضراء 

المقادير 

 فرخه مخليه من العظم

كوب ونص من الأرز المصري مغسول 

بصلة كبيره مبشوره

التوابل للفراخ : معلقه صغيره من ( ملح، فلفل اسود، ببريكا، ثوم بودر، بصل بودر، كزبره ناشفة، جنزبيل )

التوابل للأرز :معلقه كبيره من الملح والفلفل الاسود معلقه صغيره من (كاري كركم )

معلقه صغيره من الصلصه 

معلقه صغيره من المسطرده 

معلقه كبيره مليانه من زيت الببريكا ( اختياري) ويمكن استبداله بمعلقه صغيره ببريكا عاديه او مدخنه ونذوبها في معلقه كبيره زيت زيتون 

الطريقه :

في قدر صغيره نضع قليل من زيت الذرة ونضع الأرز والبصل والتوابل والصلصله ونسقيه ماء يدوب تغطي الوش، واول ميشرب الميه نطفي عليه النار وننقله طبق واسع يبرد ولازم يبرد تماما وبعدين نبدء نحشي بيه

نغسل الفرخه براحه وننشفها بمناديل المطبخ كويس جدا ونحط فوقها كيس بلاستك وندقها كويس بشكوش اللحوم عشان تتفرد بس ناخد بلنا الجلد ميتقطعش وبعدين نتبلها بالتوابل مع زيت الببريكا أو زيت الزيتون والمسطرده وندهن الفراخ كويس بالفرشه وبعدين نحط الأرز ونلف الفراخ رول وبعدين ندهن الفراخ من بره بباقي التوابل بزيت الببريكا وبعدين نلفها في ورق زبده وبعدين ورق فويل وندخلها فرن علي ٢٠٠ لمده نص ساعه وبعدين نوطي النار ل ١٨٠ لمده نص ساعه كمان وبعدين نبص عليها لو استوت نشيل الورق والفويل ونفتح الشوايه لو مستوتش نسبها كمان نص ساعه .وبعد متتحمر تحت شوايه نسبها تبرد شويه ونقطعها بسكينه مشرشره